د طالبانو بهرنيو چارو وزیر: نړيوالو بنديزونو زموږ پر مړو هم اغېز کړی
د طالبانو د ډلې د بهرنيو چارو وزير امیرخان متقي – د هغو ۱۸ تنو افغان کډوالو د جسدونو د فاتحې مراسمو کې، چې بلغاريا کې يې خپل ژوند له لاسه ورکړی ؤ – د افغانستان د خلکو پر ژوند يې د نړيوالو بنديزونو د منفي اغېز په اړه نيوکه وکړه.
متقي وويل، د طالبانو د ډلې د بهرنيو چارو وزارت د کډوالو د جسدونو د لېږد لپاره دوه ځلې هڅه وکړه، چې پیسې حواله کړي، خو بريالي نه شول.
د هغه په وينا، د دې لامل نړيوال بنديزونه ؤ، چې د دغه ډلې پر بانکي فعاليتونو لګول شوي دي.
د طالبانو دغه چارواکي زياته کړه، هغوی د همدې بنديزونو له امله ونه شو کولای چې بلغاريا ته چارټر الوتکه واستوي.
متقي وويل، دغو بنديزونو د افغانستان د خلکو د ژوند پر ټولو برخو اغېز کړی او حتی دغه اغېزې د دوی په ژويو، بوټو او مړو کې هم تر سترګو کېږي.
د طالبانو د بهرنیو چارو وزير وويل، دغه بنديزونه په هېڅ چوکاټ کې برابر نه دي او د نړيوالې ټولنې د بشري حقونو د ادعا خلاف دي.
متقي له خلکو وغوښتل، چې خپل هېواد دې نه پرې ږدي؛ ځکه د هېڅ یوه لپاره يې د «سر» خطر نشته.
هغه وويل، د طالبانو ډله هڅه کوي د ایران، پاکستان، ترکیې، متحده عربي اماراتو او سعودي عربستان په څېر هېوادونو کې بندي افغانان آزاد کړي.
د متقي په وينا، تر دې دمه شاوخوا ۲زره افغان کډوال د پاکستان له زندانونو خوشې شوي دي.
د يادونې وړ ده، چې د افغانستان د ۱۸ کډوالو جسدونه د غبرګولي مياشتې په درېيمه نېټه له بلغاريا څخه کابل ته ورسېدل. هغوی په فبرروي مياشت کې اروپايي هېوادونو ته د لېږد پرمهال بلغاريا کې په يوه کانټينر خپل ژوند له لاسه ورکړی ؤ.
